Winter On Fire ဇာတ်လမ်းဟာ ယူကရိန်းနိုင်ငံရဲ့ ပြည်တွင်းက တစ်ကယ့်အဖြစ်အပျက်တွေကို မှတ်တမ်းရုပ်ရှင် (Documentary) သဖွယ် ရိုက်ကူးတင်ဆက်ထားတဲ့ ဖြစ်ရပ်မှန် ဇာတ်လမ်းတစ်ခု ဖြစ်ပါတယ်။ ဇာတ်လမ်းရဲ့ ဒါရိုက်တာကတော့ Evgeny Atineevsky လို့ ခေါ်ပါတယ်။
ဒီဇာတ်လမ်းလေးကိုတော့ (၂၀၁၅)ခုနှစ်မှာ စတင်ထုတ်လွှင့်ခဲ့တာဖြစ်ပြီး The Most Valuable Film အဖြစ် မှတ်တမ်းတင်ခြင်း ခံထားရတဲ့ ဇာတ်လမ်းလေး ဖြစ်ပါတယ်။ ဆုတွေအနေနဲ့ (၂၀၁၅)ခုနှစ်ရဲ့ Toronto International Film Festival မှာ People's Choice Award နဲ့ (၂၀၁၆) ခုနှစ်မှာတော့ ရုပ်သံဇာတ်လမ်း အကယ်ဒမီဆုကို ရယူနိုင်ခဲ့တဲ့ ဇာတ်လမ်းတစ်ခု ဖြစ်ပါတယ်။
ဒါ့အပြင် ဒီဇာတ်ကားလေးဟာ (၂၀၁၅) နဲ့ (၂၀၁၆) ခုနှစ်အတွင်း …
- USA ရဲ့ Oscar ဆု ချီးမြှင့်ပွဲမှာ Best Documentary, Feature အဖြစ်၊
- Primetime Emmy Awards ပွဲမှာ Exceptional Merit in Documentary Filmmaking အဖြစ်၊
- Awards Circuit Community Awards (ACCA) ပွဲမှာ Best Documentary Feature Film အဖြစ်၊
- Cinema for Peace Awards ဆုပေးပွဲမှာ Most Valuable Documentary of the Year အဖြစ်၊
- Motion Picture Sound Editors, USA ရဲ့ ဆုပေးပွဲမှာ Best Sound Editing - Documentary Feature Film အဖြစ်၊
စသဖြင့် များစွာသော ကမ္ဘာတစ်ဝန်းက နာမည်ကြီး ရုပ်ရှင်ဆုပေးပွဲများရဲ့ Nominee ဝင်ခဲ့တဲ့ ဇာတ်ကားလေး ဖြစ်ပါတယ်။ ဇာတ်လမ်း အကျဉ်းလေးကိုလည်း အနည်းငယ် ပြောပြပေးချင်ပါတယ်။
ယူကရိန်းနိုင်ငံဟာ အရှေ့နဲ့ အနောက် နိုင်ငံတွေကြားထဲမှာ တည်ရှိတဲ့ နိုင်ငံတစ်ခုပါ။ (၁၉၉၀)ပြည့်နှစ် မတိုင်မီက ယူကရိန်းဟာ ဆိုဗီယက် ပြည်ထောင်စုထဲမှာ ပါခဲ့ပေမယ့် (၁၉၉၁)ခုနှစ်မှာတော့ ဆိုဗီယက် ပြည်ထောင်စုကနေ ခွဲထွက်ပြီး လွတ်လပ်တဲ့နိုင်ငံအဖြစ် ကြေညာခဲ့ပါတယ်။
ဒါပေမယ့် (၂၃) နှစ်လုံးလုံး ယူကရိန်းနိုင်ငံရဲ့ စီးပွားရေးဟာ ချွတ်ခြုံကျခဲ့ပါတယ်။ (၂၀၀၄)ခုနှစ်မှာ ရုရှားနိုင်ငံရဲ့ ဘက်တော်သားတစ်ဦးဖြစ်တဲ့ အမတ်လောင်း ဗစ်တာ ယာနူကိုဗစ်ချ်ဟာ သမ္မတအဖြစ် မဲအနိုင်ရခဲ့ပေမယ့် ရွေးကောက်ပွဲမှာ မသမာကြောင်း ပေါ်ပေါက်ခဲ့တာကြောင့် သမ္မတအရာ မရောက်ခဲ့ပါဘူး။
(၂၀၁၁) မှာတော့ ယာနူကိုဗစ်ချ်ဟာ ယူကရိန်းကို EU အဖွဲ့ဝင်မယ်ဆိုပြီး ပြည်သူတွေကို ကတိပေးခဲ့တာကြောင့် ရွေးကောက်ပွဲ အနိုင်ရခဲ့ပါတယ်။ ဒါပေမယ့် ရွေးကောက်ပွဲ အနိုင်ရပြီးတဲ့နောက် သမ္မတ ယာနူကိုဗစ်ချ်ဟာ ပြည်သူတွေကို ပေးထားတဲ့ ကတိကို ဖျက်ပြီး ရုရှားနဲ့ ပူးပေါင်းဖို့ကို ကြိုးစားခဲ့ပါတော့တယ်။
EU သဘောတူညီချက်ကို လက်မှတ်မထိုးခဲ့တာကြောင့် ကျောင်းသားတွေက မိန်ဒန်လွတ်လပ်ရေး ရင်ပြင်မှာ ဆန္ဒပြရာကစပြီး တစ်နိုင်ငံလုံး ပါဝင်လာတဲ့ သပိတ်ကြီးတစ်ရပ် ပေါ်ပေါက်လာခဲ့ပါတယ်။ သမ္မတက အထူးရဲတွေ၊ ကြေးစားလူမိုက်တွေနဲ့ ဆန္ဒပြမှုကို ဖြိုခွင်းဖို့ ကြိုးစားလာတဲ့ အခါမှာတော့ ယူကရိန်းရဲ့ ဆောင်းတွင်းတိုက်ပွဲဟာ (၉၃)ရက်ကြာမြင့်တဲ့အထိ လောင်ကျွမ်းလာခဲ့ပါတယ်။
ဒီလိုမျိုး ယူကရိန်းနိုင်ငံသားတွေရဲ့ နိုင်ငံတွင်းက ဆန္ဒပြမှုတွေ၊ (၉၃)ရက်အကြာ ပြည်တွင်း စစ်ပွဲတွေနဲ့ လွတ်လပ်ရေးအတွက် တိုက်ပွဲဝင်မှုတွေကို မျက်ရည်ဝဲစရာ၊ ကြက်သီးထစရာအဖြစ်နဲ့ မြင်တွေ့ရမယ့် မှတ်တမ်းရုပ်ရှင် ဇာတ်လမ်းတစ်ခု ဖြစ်တာကြောင့် ဖြစ်ရပ်မှန် Documentary တွေကို ကြိုက်နှစ်သက်တဲ့ ရုပ်ရှင်ချစ် ပရိတ်သတ်တွေအတွက် ကြည့်သင့်တဲ့ ဇာတ်ကားကောင်းလေးတစ်ခု ဖြစ်ပါတယ်။
ဒီဇာတ်လမ်းလေးကိုတော့ Netflix မှာ ဝင်ရောက်ကြည့်ရှုနိုင်ပြီး ကြာချိန်အနေနဲ့ မိနစ် (၁၀၀)နီးပါး ကြာမြင့်တဲ့ ဇာတ်လမ်းတစ်ခု ဖြစ်ပါတယ်။
