Technology

Android ဖုန်းတွေမှာပါတဲ့ NFC ကိုဘယ်လိုအသုံးချရမှာလဲ

How to use NFC on Android phones?

နောက်ပေါ်စမတ်ဖုန်းများမှာ NFC ကို ထည့်သွင်းပေးထားကြပေမယ့် အသုံးချနည်းများကို မသိကြသေးတဲ့ လူများစွာ ရှိပါတယ်။ NFC ဟာ ဖုန်းတစ်လုံးနဲ့ တစ်လုံးကို ကြိုးမဲ့ ဆက်သွယ်ပေးတဲ့ နည်းပညာဖြစ်ပါတယ်။ NFC နဲ့ ဖိုင်များ၊ ဖုန်းနံပါတ်များ၊ တည်နေရာများ ပေးပို့ရယူခြင်း၊ သူငယ်ချင်းအား သင့်ဖုန်းမှ App ကို လမ်းညွှန်ခြင်းနဲ့ ငွေပေးချေခြင်းများကိုတောင် ပြုလုပ်နိုင်ပါတယ်။

NFC ရဲ့ အရှည်မှာ Near Field Communication ဖြစ်ပါတယ်။ NFC က နီးကပ်တဲ့ အကွာအဝေးမှာ ဖုန်း ၂ လုံးကို ချိတ်ဆက် အလုပ်လုပ်စေပါတယ်။ ၄ စင်တီမီတာ အတွင်းမှာ ချိတ်ဆက်နိုင်ပါတယ်။ ဖုန်း ၂ လုံးစလုံး အပြန်အလှန် ဆက်သွယ်နိုင်တဲ့ Two-Way Communication ပါ။ ဝိုင်ဖိုင် ၊ မိုဘိုင်းဒေတာများ မလိုဘဲ သုံးနိုင်ပါတယ်။

သင့် Android မှာ NFC ရှိ ၊ မရှိ ဘယ်လို သိမလဲ?

ဖုန်းရဲ့ Settings> Wireless & Networks ထဲသွားပြီး NFC Option ရှိ၊ မရှိ သိနိုင်ပါတယ်။ NFC ပါတဲ့ ဖုန်းအများစုရဲ့ အနောက်ဘက်မှာ NFC Logo လေး ပါတတ်ပါတယ်။

NFC ဖြင့် ဖုန်း ၂ လုံးကို ချိတ်ဆက်ဖို့ ဖုန်း ၂ လုံးစလုံးရဲ့ Settings ထဲမှာ NFC နဲ့ Android Beam ကို Enable လုပ်ရမှာပါ။ ပြီးရင်တော့ ပေးပို့ချင်တဲ့ ဓါတ်ပုံ သို့မဟုတ် ဖိုင်ကို ဖွင့်ပြီး ဖုန်း ၂ လုံးကို ကျောချင်းကပ်ပေးလိုက်ရုံပါပဲ။ Send Via Option ကိုတောင် သုံးဖို့ မလိုပါဘူး။ ဖိုင်ပေးပို့ဖို့ သေချာပြီလားလို့ မေးရင် Touch to Beam ခလုတ်ကို နှိပ်ရမှာပါ။ NFC ဖြင့် ဖိုင်များ ပေးပို့၊ ရယူဖို့ File Beam လို App မျိုးကိုလည်း သုံးနိုင်ပါတယ်။ File Beam ကို သုံးရတာ ပိုမိုရိုးရှင်းပြီး ဖုန်း ၂ လုံးကြားမှာ ဖိုင်များ ပိုမိုလျှင်မြန်စွာ ပေးပို့နိုင်ပါတယ်။

NFC ဖြင့် ဖုန်း ၂ လုံးကြားမှာ ဓါတ်ပုံများ ပေးပို့နိုင်ပါတယ်။ ဓါတ်ပုံကို နှစ်သက်ရာ App နဲ့ ဖွင့်ပြီး ဖုန်း ၂ လုံးကို ကျောချင်းကပ်ပေးပါ။ စာရွက်စာတမ်းဖိုင်များကို ပေးပို့ချင်ရင် Android Beam ကို သုံးရပါတယ်။ ဖိုင်ကို ဖိထားပြီး Menu ကို နှိပ်ပါ။ Android Beam ကို ရွေးပါ။

သင့်ဖုန်းမှ App တစ်ခုကို သူငယ်ချင်းက ဒေါင်းလုပ်လုပ်နိုင်ရန် Play Store မှာ လမ်းညွှန်ပြသဖို့အတွက်လည်း NFC ကို သုံးနိုင်ပါတယ်။ App ကို သုံးနေစဉ်မှာ ဖုန်း ၂ လုံးကို ကျောချင်းကပ်လိုက်တာနဲ့ သူငယ်ချင်းရဲ့ ဖုန်းမှာ Play Store ကို ဖွင့်ပေးပြီး အဲဒီ App ကို ပြသပေးမှာပါ။

Google Maps ကို ဖွင့်ပြီး တည်နေရာ လမ်းညွှန်မှုတစ်ခု ဖန်တီးပါ။ ဖုန်း ၂ လုံးကို ကျောချင်းကပ်လိုက်တာနဲ့ သူငယ်ချင်းရဲ့ ဖုန်းမှာ အဲဒီ တည်နေရာ လမ်းညွှန်မှုကို ရရှိမှာပါ။

သင်နဲ့ သင့်သူငယ်ချင်းရဲ့ ဖုန်း ၂ လုံးစလုံးမှာ တူညီတဲ့ App သို့မဟုတ် ဂိမ်းတွေ ထည့်ထားတယ်ဆိုပါစို့။ သင်က ဂိမ်းကစားနေစဉ်မှာ သင့်သူငယ်ချင်းရဲ့ ဖုန်းမှာ အဲဒီ ဂိမ်းကို ဖွင့်စေချင်ရင် ဖုန်း ၂ လုံးကို ကျောချင်းကပ်လိုက်တာနဲ့ အဆင်ပြေပါပြီ။ အဲဒီအတွက် သူငယ်ချင်းက သူ့ဖုန်းမှာ အဲဒီ ဂိမ်းကို လိုက်ရှာဖွင့်စရာ မလိုတော့ပါဘူး။

NFC ကို မိုဘိုင်းငွေပေးချေမှုအတွက် သုံးနိုင်ပါတယ်။ Play Store မှာ Android Pay ကို အင်စတောလုပ်ပါ။ သင့်ရဲ့ Credit , Debit Card သတင်းအချက်အလက်များကို Android Pay မှာ ထည့်ပါ။ ပြီးရင် Credit , Debit Card တွေ ကိုင်ဆောင်စရာမလိုဘဲ Android Pay လက်ခံတဲ့ အရောင်းဆိုင်များမှာ NFC ကို အသုံးချ၍ ဖုန်းဖြင့် ငွေပေးချေနိုင်ပါပြီ။ ( မှတ်ချက်။ ။ Android Pay ကို မြန်မာပြည်မှာ သုံးလို့ မရသေးပါဘူး။ )

⇐ Previous Next

Read 1901 times