Health & Beauty

ကိုယ်ခံအားကောင်းစေဖို့ဘာတွေလိုအပ်သလဲ

What is needed to strengthen the immune system?

ခုလိုချိန်မှာ ကိုယ်ခံအားကောင်းနေဖို့ကအရေးကြီးပါသည်။ကိုယ်ခံအားကောင်းနေခြင်းက ရောဂါများကို အလွယ်တစ်ကူ ဝင်ရောက်နိုင်ခြင်းမှ ကာကွယ်ပေးပါသည်။ကိုယ်ခံအားစနစ်ဆိုသည်မှာ ရောဂါပိုးမွှားများ၊ကိုယ်နဲ့ မရင်းနှီးတဲ့ ( ကိုယ့်ပစ္စည်း မဟုတ်တဲ့) အရာများ ကို ခန္ဓာကိုယ်ထဲ အလွယ်တကူဝင်မလာနိုင်အောင် နဲ့ ၀င်ရောက်လာပါက တိုက်ထုတ် စေတဲ့ စနစ်ဖြစ်ပါသည်။

 

အထူးသဖြင့် အအိပ်ပျက်၊ အစားပျက်နေသူများ၊ ဆေးလိပ်သောက်သုံးသူများ၊ ရောဂါ တစ်ခုမှ နာလန်ထခါစပုဂ္ဂိုလ်များ၊ ၅ နှစ်အောက် ကလေးများ၊အသက် ၆၅ နှစ်အထက်လူကြီးများ၊ ကိုယ်ဝန်ဆောင်မိခင်များ၊ ကိုယ်ခံအားချို့တဲ့နေသူများ၊ အဆုတ် ၊နှလုံး၊အသည်း၊ သွေးရောဂါ နဲ့ ဆီးချိုရောဂါ အခံရှိနေသူများ ၊ နာတာရှည် အိပ်ရာထဲလဲနေသူများ အနေနဲ့ပိုပြီးဂရုပြဖို့ပိုလိုပါတယ်။ထိုပုဂ္ဂိုလ်များဟာ သူများထက်ပိုပြီး ကိုယ်ခံအား ကောင်းအောင် ဂရုတစိုက်နေထိုင်စားသောက်ဖို့ လိုပါသည်။ ဒါကြောင့် ကိုယ်ခံအားကောင်းဖို့ဆိုရင် အဓိက အချက် ၃ ချက် လိုက်နာဖို့လိုပါသည်။

1. အဟာရ ပြည့်၀ပြီး ဗီတာမင် နဲ့ သတ္တုဓါတ် တွေကြွယ်၀သော အစားအစာများစားပါ။

2. လုံလောက် ကောင်းမွန်စွာ အိပ်စက် အနားယူပါ။

3. နေ့စဥ်ပုံမှန် လေ့ကျင့်ခန်းလုပ်ပါ။

 

တချို့ ဖြည့်စွက် ဗီတာမင်၊ သတ္တုဓါတ်နဲ့ ဆေးဘက်၀င် အပင်များ ဟာလည်း ကိုယ်ခံအားကို ကောင်းမွန်စေပါသည်။ သို့သော် လုံလောက်တဲ့ ဗီတာမင်နဲ့ သတ္တုဓာတ်တွေကို နေ့စဉ်အစာက လုံလောက်စွာမရ ပါက ဆရာဝန်ညွှန်ကြားချက်အတိုင်း ဖြည့်စွက် အစာတွေ၊ အားဆေးတွေ သောက်ကြရပါသည်။ အောက်ပါ ဖြည့်စွက်စာ များက ကိုယ်ခံအားကို ကောင်းစေသော အရာများဖြစ်ပါသည်။

 

ဗီတာမင် - ဒီ

ဗီတာမင် - ဒီ ဓာတ်က အလွန်အရေးကြီးတဲ့ ဓာတ်တစ်မျိုးဖြစ်ပါသည်။ သူက အသက်ရှု လမ်းကြောင်းဆိုင်ရာ ကူးစက်ရောဂါတွေကို လျော့ချပေးပါသည်။ ဗီတာမင်ဒီကတော့ အရိုးပါ၀ါးစားနိုင်တဲ့ ငါးကလေးတွေ မှတစ်ဆင့် ရနိုင်ပြီး သူ့ကို တည်ဆောက်ဖို့ နေရောင်ခြည် အနည်ငယ်ခံဖို့ လိုအပ်ပါသည်။ အကယ်၍မလုံလောက်ပါက လူတစ်ယောက်က တစ်နေ့ကို ဗီတာမင် - ဒီ 1000 IU မှ 4000 IU ဆို လုံလောက်ပါတယ်။

ဇင့်ဓါတ်

ဇင့်ဓာတ်က သတ္တုဓာတ်တစ်မျိုး ဖြစ်ပြီး သူကလည်း အသက်ရှု လမ်းကြောင်းဆိုင်ရာ ကူးစက်ရောဂါတွေကို လျော့ချပေးပြီး ကူးစက်ခံရမှု ရက်ကိုလည်း တိုစေပါသည်။ ဇင့်ဓာတ်ကို နေ့စဉ်စားသုံးတဲ့ အစားအသောက်တွေကနေ တစ်ဆင့်သာ ရရှိနိုင်ပြီး အသား၊ငါးနဲ့ ပင်လယ်စာတွေက အဓိက ရရှိပါသည်။ ဇင့်ဓာတ်ကို ခန္ဓာကိုယ်ကမသိုလှောင်ထားနိုင်ပါဘူး။ ဒါကြောင့် ဇင့်ဓာတ်ပါတဲ့ အစာကို မစားဘူးဆိုလျှင် ဇင့်ဓာတ်ချို့တဲ့ သွားနိုင်ပါသည်။ အကယ်၍မလုံလောက်ပါက တစ်နေ့ကို 30mg လောက် သောက်ရင် လုံလောက်ပါသည်။

 

ဗီတာမင် - စီ

ဗီတာမင် - စီ ဟာ အားလုံးသိကြတဲ့အတိုင်းကိုယ်ခံအားစနစ်အတွက်မရှိမဖြစ်ပါ။ အအေးမိ ဖျားနာ အပြင် အသက်ရှု လမ်းကြောင်းဆိုင်ရာ ကူးစက်ရောဂါတွေကို လျှော့ချ ပေးရုံသာမက ရက်တို နဲ့သက်သာစေပါသည်။ဗီတာမင် - စီ ပါ၀င်သော လိမ္မော်သီး၊ သံပရာသီးစတဲ့ အချဉ်ဓာတ်ကဲသော အသီးအနှံများကို စားသုံးပေးသင့်ပါသည်။ အကယ်၍မလုံလောက်ပါက 250mg မှ 1000 mg ထိသောက်နိုင်ပါသည်။ရောဂါဖြစ်တဲ့ အချိန် ပမာဏ များများသောက်တာ အာနိသင်ပိုကောင်းတယ်လို့ ဆိုပါသည်။

 

အဓိက ဇာတ်လိုက်တွေ ပြီးတော့ တစ်ခြားသော ရှားပါ ဓာတ်ပေါင်းများနဲ့ ဆေးဖက်၀င် ပစ္စည်းများကလည်း ကိုယ်ခံအားကောင်းစေပါသည်။ စီလန်နီယမ် (Selenium) ကလည်း ကိုယ်ခံအားအတွက် အရေးပါတဲ့ သတ္တုဓါတ်တစ်မျိုး ဖြစ်ပါသည်။ သုတေသနတစ်ခုအရ သူက ဗိုင်းရက်ပိုးမွှားများ ဖြစ်ကြတဲ့ influenza ( H1N1) တို့ကို တိုက်ထုတ်ရမှာ တိုးမြှင့်စေပါသည်။သူကတော့ ပင်လယ်စာ၊ အသည်း၊ အသားတွေနဲ့ အစေ့အနှံတွေက ရပါသည်။ ဗီတာမင် ဘီ များကလည်း မေ့ထားလို့ မရတဲ့ ကိုယ်ခံအားကောင်းစေတဲ့ ဗီတာမင်များပဲ ဖြစ်ပါသည်။ သူတို့ချို့တဲ့ရင် ကိုယ်ခံအား ကျတတ်ပါသည်။ ထိုပြင် မီးဖိုချောင် မှ အစားအစာ များဟာလည်း ကိုယ်ခံအားကောင်းစေပါသည်။

 

အချုပ်အားဖြင့်ဆိုရသော်ကိုယ်ခံအားကောင်းဖို့ ကိုယ်ခံအားတက်စေသော အစားအသောက်များ စားပေးခြင်း အပြင်ကောင်းမွန်စွာ အိပ်စက်အနားယူခြင်း၊ လေ့ကျင့်ခန်း ပုံမှန် လုပ်ခြင်း တို့ဟာ လွန်စွာ အရေးပါပါသည်။ထို့ပြင် အစာလည်းဆေး ဆေးလည်း အစာ ဆိုသလို စနစ်တကျ ရွေးချယ် စားသောက်ဖို့လဲ လိုအပ်ပါသည်။အမျိုးသားပဲဖြစ်ဖြစ်၊ အမျိုးသမီးပဲ ဖြစ်ဖြစ် အသက် အရွယ်ရလာတာနဲ့ အမျှဗီတာမင်နဲ့ သတ္တုဓာတ်တွေ လိုလာကြပါသည်။ ထိုအခါ အစားအသောက် နဲ့ မလုံလောက်ပါက ဖြည့်စွက် အစာများ၊ အားဆေး များသောက်သုံးနိုင်ပါတယ်။

⇐ Previous Next

Read 1091 times