ရန်ကုန်မြို့နေ အပန်းဖြေမှု ပုံစံများထဲ စနေ၊ တနင်္ဂနွေ ပိတ်ရက်ညတွေမှာ သူငယ်ချင်းအပေါင်းအသင်းတွေနဲ့အတူ ဘီယာဆိုင်တစ်ဆိုင်ကို ဦးတည်ပြီး ပရီးမီးယားလိဂ် ဘောလုံးပွဲစဉ်တွေကို အတူတကွကြည့်ရှု အားပေးခြင်းဟာ ပုံမှန်လို ဖြစ်နေပါပြီ။ တစ်ပတ်တာ အလုပ်ပင်ပန်းမှု၊ စိတ်ဖိစီးမှုတွေအားလုံးကို ဘေးဖယ်ထားပြီး ပိတ်ရက်ညမှာ ကိုယ်ချစ်တဲ့ အသင်းအတွက် အားပေးရင်း လွတ်လပ်ပျော်ရွှင်ခွင့်ကို ရယူကြပါတယ်။

ညနေပိုင်း ဒါမှမဟုတ် ညဘက်မှာ ကန်လေ့ရှိတဲ့ ပွဲစဉ်တွေအတွက် သူငယ်ချင်းတွေဟာ ဘီယာဆိုင် ဒါမှမဟုတ် Sports Bar လိုမျိုး နေရာတစ်ခုမှာ စုစည်းမိကြပါတယ်။ ဒီနေရာတွေဟာ ရန်ကုန်ညတွေရဲ့ ဘောလုံးပွဲကြည့်ရှုရင်း ဘီယာသောက်ကြတဲ့ ယဉ်ကျေးမှုကို ဖော်ညွှန်းတဲ့ နေရာတွေပါ။ ကြီးမားတဲ့ ပရိုဂျက်တာတွေ၊ တီဗီဖန်သားပြင်တွေ၊ တစ်ဆိုင်လုံးကို လွှမ်းခြုံထားတဲ့ ဘောလုံးပွဲ အငွေ့အသက်တွေနဲ့အတူ၊ အေးစက်နေတဲ့ ဘီယာခွက်တွေက ဝိုင်းဖွဲ့မှုကို ပိုမိုပြည့်စုံစေပါတယ်။ စားပွဲဝိုင်းမှာ ရောက်တာနဲ့ ကိုယ့်အသင်း၊ ပြိုင်ဘက်အသင်းရဲ့ အခြေအနေတွေနဲ့ ပွဲအပေါ် ခန့်မှန်းချက်တွေကို စိတ်အားထက်သန်စွာ ဆွေးနွေးငြင်းခုံကြတာဟာ ပွဲမစခင်ကတည်းက ပျော်ရွှင်စရာ ကောင်းနေပါပြီ။

ဒိုင်လူကြီးရဲ့ ဝီစီသံနဲ့အတူ ပွဲစပြီဆိုတာနဲ့ တစ်ဆိုင်လုံးရဲ့ အာရုံစိုက်မှုက ဖန်သားပြင်ဆီကို ရောက်ရှိသွားပါတယ်။ ဂိုးသွင်းခွင့် တစ်ကြိမ်စီတိုင်း၊ ဖရီးကစ် (Free Kick) တစ်လုံးစီတိုင်းဟာ အားလုံးရဲ့ ရင်ခုန်သံကို မြန်ဆန်စေပါတယ်။ အထူးသဖြင့် ကိုယ့်အသင်းက ဂိုးသွင်းနိုင်ပြီဆိုတာနဲ့ တစ်ပြိုင်နက် တစ်ဆိုင်လုံးဟာ ပေါက်ကွဲသံကြီးတစ်ခုလို အားပေးသံတွေ၊ ဟစ်အော်သံတွေနဲ့ ဆူညံသွားပြီး အားလုံးဟာ ထိုင်ခုံတွေပေါ်ကနေ ကန်ထွက်လာသလို ထခုန်ကြ၊ လက်ဝါးချင်းရိုက်ကြတာဟာ အဲဒီညရဲ့ အမြင့်ဆုံး စိတ်လှုပ်ရှားမှုပါပဲ။

ပွဲပြီးဆုံးတဲ့အထိ စိတ်လှုပ်ရှားမှုတွေ၊ အောင်ပွဲခံခြင်းတွေ၊ ဒါမှမဟုတ် ရှုံးနိမ့်လို့ စိတ်ပျက်ခြင်းတွေကို သူငယ်ချင်းတွေနဲ့အတူ မျှဝေခံစားရခြင်းက အဖိုးမဖြတ်နိုင်တဲ့ အပန်းဖြေမှုတစ်ခုပါပဲ။ ဘောလုံးပွဲတွေဟာ လူအချင်းချင်း ဆက်ဆံရေးကို ပိုမိုခိုင်မာစေတဲ့ ကြားခံတစ်ခုဖြစ်ပြီး ရန်ကုန်မြို့ရဲ့ အလုပ်ချိန်ပြင်ပ ဘဝကို ပိုမိုအရသာရှိစေတဲ့ ချစ်စရာ ဓလေ့တစ်ခုဖြစ်ကြောင်း MY Yangon Guide က တင်ဆက်လိုက်ပါတယ်။

မိတ်ဆွေရော … ညဘက်တွေမှာ သူငယ်ချင်းတွေနဲ့ ဘီယာဆိုင်ထိုင်ရင်း ဘောပွဲကြည့်ရတာ ဝါသနာပါသူလား၊ ဘယ်အသင်း အားပေးသူလဲ၊ MY Yangon Guide က ရန်ကုန်မြို့ရဲ့ ညအကြောင်းတွေ ပွဲလမ်းသဘင်အကြောင်းတွေ စဉ်ဆက်မပြတ် တင်ဆက်နေမှာမို့ နေ့တိုင်း ဒီဝက်ဆိုဒ်ထဲကို ဝင်ကြည့်ဖို့ မမေ့ပါနဲ့နော် ….